未講片先講片名，港台陸分別譯為《挑戰者一號》、《一級玩家》、《玩家一号》，三者都唔精準，但挑戰者一號勉強算最接近，玩家一號其次。
原名「Ready Player One」既由來，就係80年代打機開機畫面時既提示，加返個逗號「Ready, Player One (第一位打果條撚樣，準備啦)」， 就會好清晰。
順帶一提，如果係雙打game，1P 死左，就會顯示Ready Player Two，亦即「2P 開波啦」 。
套戲本身就係爽片，尤其是高潮位「俺はガンダムで行く」。可惜咁重要既彩蛋，片商居然放落Trailer度....到正式睇果陣，「市場已經消化有關資訊」...
但電影內容本身，一來唔知佢想傳達咩野觀點，二來太多唔合理既設定：
- 明明經濟未崩潰，點解會出現咁恐怖既貧民窟，連樓梯都無ww
- 如果已經可以係虛擬世界「綠洲」度返工，點解要返現實公司處理？如果唔可以，咁點解可以張揚到係返工時打機，輸左就跳樓？
- 可以購買「殺晒成個星球既角色，將玩家花十年時間經營既心血一秒刪除」既行星炸彈，邊條契弟發明呢種商城道具？
- 敵方創線企係世界第二大企業，但我真心想問，佢地既盈利模式係點黎....因為所有人都去晒綠洲度，而綠洲可以靠賣車賣燃料賣商城，但創線企無可能有權限賣到呢d野，頂多就自製頭像模組。而遊戲需要真人操作，亦即唔可以好似中國大陸咁玩遊戲工廠代客練功賣裝。
除非係當前期投資，好似Uber進軍香港時就用銀彈戰、每月5萬人工 (而家得返1~2萬)。但係網上遊戲，又唔見得係有錢就贏 。創線企拎到彩蛋奪取綠洲控制權既可能性，真係低到....
係啦，講開又講，綠洲創辦人死後，而家係邊個營運架？真接問佢買咪得囉...
- 之前講到創線企咁隻手遮天，又炸貧民窟，又可以自行擄人做奴隸還債，結果警察一到你就舉高雙手被捕做乜...
- 最後主角貌似係想叫人唔好上太多網，咁呢個又係要去返第二點，如果政府解決唔到現實問題，我唔上網我一樣解決唔到架喎。
